Mahallalarda ijtimoiy xizmatlar kompleks yondashuv asosida ko‘rsatiladi
“Mahallalarda ijtimoiy xizmatlarni ko‘rsatish va ijtimoiy himoyaga muhtoj oilalarga yordam berish tizimini yangi bosqichga ko‘tarish hamda xotin-qizlarni kasbga o‘rgatish ishlarini yana-da jadallashtirish chora-tadbirlari to‘g‘risida”gi Prezident qarori qabul qilindi.
Qarorga ko‘ra, 2022 yil 1 iyuldan Mahallalarda kompleks yondashuv asosida ijtimoiy xizmatlarni tashkil etish tizimi bosqichma-bosqich joriy qilinadi.
Qaror bilan Mahallalarda kompleks yondashuv tizimi asosida ijtimoiy xizmatlarni joriy qilishni muvofiqlashtirish bo‘yicha respublika shtabi tashkil qilindi.
2022 yil 1 noyabrgacha:
mahallalardagi xotin-qizlar faollari har 2 haftada Hududiy shtablarga quyidagi maʼlumotlarni kiritadi:
xonadonlar ahvoli, oilalarning ijtimoiy xizmatlarga ehtiyoji;
oilalarga aniq ijtimoiy xizmat ko‘rsatish bo‘yicha maʼlumotlar;
murakkab operatsiyalarga, nogironlarning protez-ortopediya buyumlariga ehtiyoji bo‘yicha buyurtmalar;
Hududiy shtablar ushbu maʼlumotlarni o‘z hududi kesimida umumlashtirgan holda 2 kunda Muvofiqlashtirish shtabiga yuboradi;
Muvofiqlashtirish shtabi kelib tushgan maʼlumotlar asosida 3 kunda haqiqatda ijtimoiy xizmatga ehtiyojmand bo‘lgan oilalarga Hududiy shtab aʼzosining masʼul xodimi tomonidan manzilli ijtimoiy xizmat ko‘rsatilishini tashkillashtiradi.
Shuningdek, 2022-2023 yillarda respublika bo‘yicha jami 827 780 nafar (shundan joriy yilda 383 565 nafar) xotin-qizlarni kasb-hunarga o‘qitish va ularning bandligini taʼminlash nazarda tutilgan.
2022 yil 1 avgustdan dastlab Surxondaryo viloyatidagi mahallalarda
(2022 yil 1 noyabrdan respublikaning boshqa barcha mahallalarida) “Mahallada ijtimoiy xizmat” moduli orqali ijtimoiy xizmatlar ko‘rsatish tizimi joriy etiladi.
Mehnat bozorida teng sharoitlarda raqobatlasha olmaydigan xotin-qizlarni kasbga o‘qitish bilan bog‘liq xarajatlarning 70 foizi, biroq har bir bitiruvchiga BHMning 4 barobaridan oshmagan miqdori davlat tomonidan qoplab beriladi.
Н.Қодиров
Бахмал тумани Адлия бўлими бошлиғи